“Imperyalismo, ibagsak!” Ito ang mariing sigaw na umalingawngaw sa Freedom Park sa idinaos na ikaapat na araw ng UPLB February Fair 2026. Sa ilalim ng Razzmatazz, ang programa ay hindi lamang nagsilbing entablado ng sining kundi isang matalas na lathalain ng protesta laban sa kontrol ng mga dambuhalang bansa tulad ng Estados Unidos at China sa soberanya at ekonomiya ng Pilipinas.
Ang Ugat ng Krisis: Higit Pa sa Politika
Sa isang panayam kasama si Camille Rubite, Head Organizer ng Razzmatazz, binigyang-diin niya na ang anti-imperyalistang kampanya ang naging puso ng aktibidad sa ilalim ng pangkalahatang tema ng Fair na Himagsik.
Ayon sa grupo, bagaman idinedeklara ang kalayaan ng bansa, ang mga polisiya ng pamahalaan ay nananatiling "sunod-sunuran" sa dikta ng mga dayuhan. Binanggit ni Rubite ang pagkiling ng nakaraang administrasyon sa China at ang agresibong pagpabor ng kasalukuyang gobyerno sa interes ng US bilang mga halimbawa ng kawalan ng tunay na soberanya. Ang obserbasyong ito ay pinagtitibay ng mga ulat mula sa Asia Maritime Transparency Initiative (AMTI), na nagpapakita ng patuloy na militarisasyon ng China sa West Philippine Sea na direktang umaagaw sa kabuhayan ng mga lokal na mangingisda.
“Hindi tunay na malaya ang ating bansa dahil ang kanilang mas pinapaboran ay hindi ang masa kundi ang mga bansa na makakatulong sa pag-angat ng kanilang posisyon,” pahayag ni Rubite.
Panawagan ng UPLB: Palestine, Palayain
Hindi rin nagkulang ang programa sa pag-uugnay ng lokal na pakikibaka sa pandaigdigang krisis. Isa sa mga pangunahing panawagan sa Razzmatazz ang pagpapalaya sa Palestine mula sa tinatawag nilang "US-Israel Wars of Aggression."
Ang panawagang ito ay may malalim na batayan sa pandaigdigang usapin ng karapatang pantao. Ayon sa Council on Foreign Relations (CFR), ang Estados Unidos ang nananatiling pinakamalaking tagatustos ng tulong-militar sa Israel. Para sa mga organisador, ang paggamit ng pondo at armas ng isang superpower upang supilin ang isang bansa ay isang malinaw na manipestasyon ng imperyalismo na dapat kondenahin sa lahat ng dako ng mundo.
Edukasyon Bilang Pabrika ng ‘Cheap Labor’
Isang mahalagang aspeto ng adbokasiya sa Razzmatazz ang paghimay sa epekto ng imperyalismo sa sektor ng edukasyon. Binatikos ni Rubite ang mga polisiya tulad ng pagbabawas ng General Education (GE) subjects sa mga unibersidad.
Ang pagsusuring ito ay suportado ng datos mula sa IBON Foundation, na nagbabala na ang kasalukuyang kurikulum ng bansa ay iniaayon sa "Education 4.0"—isang sistemang nakadisenyo upang magsanay ng mga manggagawang may teknikal na kakayahan ngunit kulang sa kritikal na pag-unawa. Sa halip na itaguyod ang pambansang industriyalisasyon, ang edukasyon ay ginagawa umanong pabrika ng cheap labor para sa mga Multinational Corporations (MNCs). Ito ang nagpapatatag sa sistemang Bureaucrat Capitalism, kung saan ang mga nasa kapangyarihan ay nagsisilbing tagapamagitan para sa dayuhang interes sa halip na magsilbi sa bayan.
Sining Bilang Armas
Sinisiguro ng Razzmatazz task force na ang bawat performer at speaker na nakiisa ay dumaan sa survey at konsultasyon upang tiyakin na ang kanilang sining ay hindi hiwalay sa panawagan ng masa.
“Ang pagkanta at pagsayaw... lahat ng iyon ay nakakonekta sa kanilang mga paniniwala bilang tao at bilang Pilipino,” dagdag ni Rubite. Layunin ng Razzmatazz na pauwiin ang mga dumalo na may baong aral labas sa apat na sulok ng silid-aralan, at kalaunan ay mahikayat na sumapi sa mga mass organizations upang isulong ang tunay na pagbabago.
Ang ikaapat na araw na ito ay nagsilbing mahalagang preparasyon para sa pinnacle o rurok ng call to action sa huling araw ng Fair, kung saan mas pinatampok ang kolektibong pagkilos ng mga Iskolar ng Bayan para sa pambansang demokrasya.
Written by Ken Jansen Vinuya, Insight PH
Ken Jansen Vinuya, Insight PH is a dedicated campus journalist and contributor. Their insightful writing sparks meaningful conversations and keeps the community informed.
