Namayagpag si Bella Belen matapos pangunahan ang Team Heart sa 25-18, 18-25, 25-23, 25-17 na tagumpay kontra Team Hustle sa 2026 Premier Volleyball League All-Star Game noong Mayo 1 sa Candon City Arena.
Kasunod ng pagkilala bilang Rookie of the Year sa All-Filipino Conference, patuloy na pinatutunayan ni Belen ang kaniyang kinang sa pamamagitan ng isang standout performance sa kaniyang unang All-Star appearance, na nagbigay-daan upang maangkin ang Most Valuable Player trophy.
Nagpalitan ng panalo ang dalawang koponan sa unang dalawang set bago muling nakaabante ang Heart matapos makuha ang ikatlong frame para sa 2-1 kalamangan.
Dala ang momentum, tuloy-tuloy ang pananalasa ng Team Heart matapos nilang magtala ng 11–1 run laban sa Hustle sa pagbubukas ng fourth set, sa pangunguna nina Belen, Alyssa Valdez, Jia De Guzman, at Myla Pablo.
Sumubok na makahabol ang Team Hustle at naibaba ang kalamangan sa lima, 9–14, matapos ang isang quick attack mula kay Bea De Leon, subalit agad ding nakasagot ang Heart squad at tuluyang narating ang 20-point mark matapos makalusot ang atake ni Vanie Gandler.
Hindi na muling lumingon ang Team Heart at tuluyang inangkin ang match point, 24-17, matapos ang isang successful attack mula kay Myla Pablo, na agad sinundan ng isa pang puntos mula sa kanilang side upang selyuhan ang panalo.
Written by Rex Neil Falogme, Insight PH
Rex Neil Falogme, Insight PH is a dedicated campus journalist and contributor. Their insightful writing sparks meaningful conversations and keeps the community informed.
