Dinala sa pangpang ng isang mangingisda ang di umanong latak ng 'rocket' na may ukit ng pambansang watawat ng Tsina sa Barangay Suang Bunah, Pangutaran, Sulu, noong Disyembre 30, 2025.
Ayon sa ulat ng Philippine Coast Guard (PCG), nakikipag-ugnayan ang Coast Guard Station Western Sulu para sa posibleng paglipat ng nakuhang latak, nang maisaayos ang pangangasiwa at disposisyon.
Wala pang naitalang detalye kung saan ang eksaktong pinanggalingan nito.
Sa ngayon, nasa kustodiya pa rin ng Barangay Suang Bunah ang narekober na parte.
Inaanyayahan naman ng PCG na manatiling alerto at agad na ireport kung sakaling may matatagpuan pa na ibang parte, o kahina-hinalang bagay na makita sa karagatan ang publiko.
Sa sitwasyon na mayroong matagpuan, may paalala rin na huwag lapitan o hawakan, upang makaiwas sa posibleng panganib sa kalusugan. Ilan sa posibleng dahilan ng panganib ay ang mataas na lebel ng kemikal mula sa residual fuel ng isang raketa. Isa sa mga pinaka-toxic na kemikal ay ang hydrazine na hinaluan ng hydrogen peroxide (HP).
Kung paulit-ulit na ma-expose sa mga kemikal na ito, malaki ang posibilidad na masira ang genetic material katulad ng DNA o chromosome, ng isang tao. Ang kombinasyon ng hydrazine at HP ay itinuturing animal carcinogens, o nakapagdudulot o nakapagpapataas ng posibilidad ng kanser sa mga hayop.
Kasalukuyan namang pinag-aaralan ang pagiging human carcinogen ng hydrazine.
Written by Mihaela A. Amistoso, Insight PH
Mihaela A. Amistoso, Insight PH is a dedicated campus journalist and contributor. Their insightful writing sparks meaningful conversations and keeps the community informed.
