Nakaranas ng matinding pagbaha ang ilang bahagi ng Mindanao noong Lunes dahil sa easterlies na nagdulot ng malalakas na pag-ulan, ayon sa Philippine Atmospheric, Geophysical and Astronomical Services Administration (PAGASA).
Rumagasa sa Alamada, Cotabato ang putik at malalaking bato patungo sa national highway kaya maraming motorista ang naiwang stranded.
Inabot nang humigit-kumulang walong oras ang clearing operations bago tuluyang naging maayos ang daloy ng trapiko sa lugar.
Lubog din sa baha ang ilang kabahayan at taniman sa Northern Kabuntalan, Maguindanao Del Norte, matapos umapaw ang ilog dulot ng tuloy-tuloy na pag-ulan.
Inaasahan ang light to moderate rains sa Mimaropa, Visayas, at Mindanao, habang nananatiling mababa ang tsansa ng ulan sa Metro Manila.
Sa kabila ng malakas na pag-ulan, nagpapatuloy ang matinding init sa malaking bahagi ng bansa. Batay sa forecast ng PAGASA, inaasahang aabot sa 44°C ang heat index sa Dagupan, Pangasinan. Inaasahan naman ang 43°C sa Sinait, Ilocos Sur; Laoag, Ilocos Norte; at Bacnotan, La Union.
Pumalo naman sa 42°C ang heat index sa Batac, Ilocos Norte; Tuguegarao, Cagayan; San Ildefonso, Bulacan; at Davao City. Ang mga antas na ito ay nasa “danger level”, kung saan mataas ang panganib ng heat exhaustion at heat stroke.
Nasa “extreme caution level” naman ang Iloilo City, Dumaguete, at Catbalogan, Samar, na may heat index na humigit-kumulang 40°C. Sa Pasay City, inaasahang aabot sa 39°C ang temperatura.
Pinapayuhan ng PAGASA ang publiko na manatiling alerto sa biglaang pagbaha at landslide, at mag-ingat din sa epekto ng matinding init sa kalusugan.
Written by Doreen P. Cabildo, Insight PH
Doreen P. Cabildo, Insight PH is a dedicated campus journalist and contributor. Their insightful writing sparks meaningful conversations and keeps the community informed.
