Tuluyang natuldukan ang impresibong kampanya ni 'Filipina Ace' Alex Eala matapos yumukod kay World No. 11 Ekaterina Alexandrova sa iskor na 6-3, 6-3 sa Mubadala Abu Dhabi Open singles quarterfinals noong Huwebes, ikalima ng Pebrero.
Matapos ang 2-6, 6-4, 7-6 (5) comeback win kontra Aliaksandra Sasnovich, hindi na muling naikamada ni World No. 45 Eala ang laban matapos ang dalawang straight-set na pagwalis ni Alexandrova.
Maagang dinomina ni 31-year-old Russian at five-time WTA singles champion, Alexandrova ang unang frame ng laro sa bisa ng 3-0 na pag-alagwa.
Mula dito, hindi nagpahuli si Eala matapos magpakawala ng solidong serves at baseline shots sa midway ng unang set dahilan upang maikartada ang dalawang break points, 15-40.
Subalit pinatunayan pa rin ni Alexandrova ang kaniyang dominasyon matapos magpundar ng clutch shots upang maitakas ang comeback attempt ni Eala swak para makopo ang 6-3 first set win.
Patuloy na dinala ni Russian tennister ang kaniyang momentum sa ikalawang set matapos magbalandra ng 3-1 early lead walkaway sa likod ng malilinis na ball strikes.
Sa kabilang banda, tinangka pa ring humirit ni Eala matapos maidikit ang talaan sa 4-3 ngunit agarang binarikadahan ni Alexandrova ang namumuong pwersa hanggang sa maisara ang second set sa iskor na 6-3.
Bagaman pabor kay Eala ang partisan crowd support, nanatiling matatag si Alexandrova sa buong laro.
“The crowd—I know they’re cheering for her, but the atmosphere was great,” pahayag ni Alexandrova pagkatapos ng laban.
Dahil dito, tututukan pa ni Eala ang kaniyang laban sa quarterfinal doubles kasama si Janice Tjen laban sa duo nina Cristina Bucsa at Zhang Shuai.
Written by Florenz Gie Abit, Insight PH
Florenz Gie Abit, Insight PH is a dedicated campus journalist and contributor. Their insightful writing sparks meaningful conversations and keeps the community informed.
