Umalingawngaw ang panawagan ng WAR (Women Against Repression) Show sa ikalawang araw ng University of the Philippines – Los Baños (UPLB) February Fair 2026 para sa makatarungan at pantay na pagtrato sa mga kababaihan, kabataan, at miyembro ng LGBTGIA+ Community bilang paglaban sa pagkakapantay-pantay ng bawat mamamayan.
Pinangunahan ito ni Jhezarie Ybarrita, isang women’s right advocate at mag-aaral sa UPLB, na matapang na nakikibaka para sa karapatan ng mga Pilipino.
Kabilang sa adbokasiya ng WAR Show ang paglaban sa pang-aabuso, pasismo, korapsyon, gender equality, at ‘ghost’ flood control projects sa bansa.
SOGIE Bill, huwag hayaang nakatengga
Iginiit din ni Ybaritta na dapat nang ipasa sa kongreso ang Sexual Orientation and Gender Identity or Expression Equality (SOGIE) Bill sa kadahilanang matagal na itong nakatengga at hindi pa natatamasa ng sangkabaklaan ang kalayaang matagal na nilang inaasam.
Aniya, patuloy pa ring ipinagkakait sa kanila ang mga karapatan sa pag-aalaga ng kalusugan, trabaho, at maging ang ‘di matapos-tapos na diskriminasyon.
“Dapat natatamasa rin ng mga LGBTQIA+ ang basic rights na tinatamasa ng mga mamamayan sa Pilipinas,” pagbibigay-diin pa niya.
Kabilang din sa natalakay ang isyu sa healthcare services sa mga miyembro ng LGBTQIA+ kung saan hindi kinikilala bilang mag-asawa ang dalawang taong may magkaparehong kasarian.
“May mga cases na hindi pinayagan yung kinakasama mo ang mag-alaga sa’yo kung hindi aprubado ng estado na mag-asawa kayo,” ani Ybaritta.
Kaugnay nito, napag-usapan naman ang isyu tungkol kay Nic Chien, anak ni Lea Salonga, na matatandaang unang naglantad bilang trans at ngayon ay isa nang bisexual.
Nilinaw niya na ‘fluid’ ang kasarian nito at hindi ang ibang tao ang magdedesisyon sa kung ano ang nararamdaman at gusto nitong ipahayag sa ibang tao.
Tibagin na ang korapsyon
Bukod sa pantay na pagtrato sa LGBTQIA+ Community, ipinaglaban din ni Ybarrita ang pagpapatalsik kay Pangulong Ferdinand ‘Bongbong’ Marcos Jr. at Bise Presidente Sara Duterte.
Paliwanag pa ni Ybarrita, dapat na napupunta sa basic social services ang pondo ng bansa, hindi sa mga walang kwentang flood control projects at tinawag na ‘hari at reyna ng korapsyon’ sila Marcos at Duterte.
“Sa hinaba-haba ng panunungkulan nila dito sa Pilipinas ay napatunayan na sila ay berdugo at mapanupil sa mga mamamayan na lumalaban at lalong-lalo na sa mga kabataan na tunay na boses ng masang anak-pawis,” matapang na pahayag niya.
Hinihiling din ng mag-aaral ng UPLB na marinig at mapagtanto ng kabataan na ang boses nila ang magiging susi ng tagumpay sa pagpapabagsak sa mga kurakot sa bansa.
Abante tungo sa tagumpay
Hinikayat naman ni Ybarrita na sumali sa mga makamasang organisasyon gaya ng Gabriela Youth Partylist-UPLB na nagsusulong ng karapatan ng mga bata, bakla, at bayan.
Dagdag pa niya, dito matututunan kung gaano kabulok ang estadong kinabibilangan natin at kung paano makatutulong sa pagpapabagsak nito.
“Sa kolektibong kilos, makukuha natin ang tagumpay at ganap na paglaya,” panapos na pahayag ni Ybarrita.
Samantala, sinigurado ng mga tagapamahala ng naturang event na ang mga speakers at artist na kinuha para sa WAR Show 2026 ay mabusising sinala at kilala bilang mga tunay na tagapagsulong ng karapatan ng kababaihan sa kongreso.
Written by Maria Lourhyz Ebasco, Insight PH
Maria Lourhyz Ebasco, Insight PH is a dedicated campus journalist and contributor. Their insightful writing sparks meaningful conversations and keeps the community informed.
